Abdullayev Qasım İbrahim oğlu (1873, Şuşa – 1927, Şuşa) – xanəndə.

Qarabağ muğam ifaçılığı məktəbinin tanınmış nümayəndəsi. “Zabul-Segah” muğamının bənzərsiz ifaçısı olmuş və xalq arasında “Zabul Qasım” adı ilə məşhurlaşmışdır. Şuşada və Bakıda muğam məclislərində və “Şərq konsertləri”ndə çıxış etmişdir. Şuşada tamaşaya qoyulmuş Üzeyir Hacıbəyovun “Leyli və Məcnun” operasında Məcnunun atası rolunu məharətələ ifa etmişdir.

1914 ildə “Sport-Rekord” səsyazma şirkətinin dəvətilə Tiflis şəhərində Qasım Abdullayevin ifasında “Zabul-Segah”, “Bayatı-Şiraz”, “Hümayun”, “Şur”, “Mahur-Hindi” muğamları və təsniflər qrammofon vallarına yazılmışdır. Qasım Abdullayev ifaçılıqla yanaşı, müəllimliklə də məşğul olmuş, Şuşada musiqi məktəbində muğamatdan dərs demiş və xanəndələr nəsli yetişdirmişdir