Ağabala Ağa Səid oğlu -(1860, Bakı
– 1928, Bakı) – xanəndə.
XIX əsrin sonu - XX əsrin əvvəllərində
Bakıda yaşayıb-yaratmış məşhur
xanəndə, muğam bilicisi. Gənc yaşlarından
şeirə, musiqiyə böyük həvəs göstərmiş,
fars dilini mənimsəyərək, Yaxın Şərqin
poeziya inciləri ilə tanış olmuşdur. 1880
illərdə Bakıda yaradılan və şair Ağakərim
Salikin evində toplanan “Məcməüş-şüəra”
ədəbi məclisinin şeir və musiqi ilə
müşayiət olunan, poeziya və muğam barədə
maraqlı müzakirələr keçirilən yığıncaqlarında
böyük həvəs və maraqla iştirak etmiş
və bütün bunlar onun sənətkarlığının
inkişafına böyük təsir göstərmişdir.
Muğamları xüsusi bir yaradıcı şövqlə
oxuyan Ağabala Ağasəid oğlu əsasən muğam
məclislərində çıxış edirdi.
Ağabala Ağasəid oğlu savadlı, şeiri,
musiqini bütün bütün varlığı ilə
sevən, onu qiymətləndirən, məlahətli
səsə malik bir xanəndə olmuşdur. Onun yaradıcılıq
dəst-xəttinin başlıca xüsusiyyəti söz
seçmək, onu dinləyiciyə aydın çatdırmaq
bacarığı idi. O, sözə adamları düşündürmək,
ruhlandırmaq məqsədi ilə müraciət edər,
ifa zamanı kəlmə və ifadələri aramla,
musiqi cümləsinin tempinə və xarakterinə
uyğun oxuyurdu. “Bayatı-Şiraz”, “Rast”, “Şur”,
“Segah-zabul” muğamlarını olduqca təsirli oxumuşdur.
Xanəndə Şirin Axundov, Mənsur Mənsurov, Əhməd
Bakıxanov, Mirzə Fərəc Rzayev kimi tarzənlərin
müşayiətilə çıxış etmişdir.