Azərbaycan Xalq Çalğı Alətləri
Ansamblı
–
müxtəlif xalq çalğı alətlərindən
təşkil olunmuş ansambl; tərkibinə simli (tar,
ud, kamança, qanun, saz), nəfəsli (zurna, balaban, tütək)
və zərbli (nağara, qoşanağara, şaxşax
və s.) musiqi alətləri qrupları daxildir. Müxtəlif
ansambllarda bu qruplardakı alətlərin sayı dəyişilə
bilir.
Adətən, xalq çalğı alətləri ansambllarının
tərkibinə qarmon, klarnet, gitara və skripka alətləri
də daxil edilir. Xalq çalğı alətləri ansambllarının
repertuarı muğam, təsnif, rəng, xalq mahnı
və rəqslərindən ibarət olur. Xalq çalğı
alətləri ansambllarının əsas xüsusiyyəti
şifahi ənənə əsasında (notsuz) ifa tərzindən
ibarətdir. Belə ansambllar tərəfindən xanəndələri
müşayiət edərək muğam dəstgahlarının
ifa olunması geniş yayılmışdır.
Respublikada bu cür kollektivlərin sayı çoxdur.
Onlardan Əhməd Bakıxanov adına xalq çalğı
alətləri ansamblı, Baba Salahov adına “Xatirə”
xalq çalğı alətləri ansamblı, Əhsən
Dadaşov adına “Araz” xalq çalğı alətləri
ansamblı və respublikanın müxtəlif şəhərlərində,
rayon mərkəzlərində, Ali və orta ixtisas məktəblərinin,
mədəniyyət saraylarının nəzdində
fəaliyyət göstərən ansambllar qeyd oluna bilər.