Haşımov Bakir Musa oğlu
(1926, Ağdam – 1989, Bakı)
– xanəndə. Qarabağ xanəndəlik ənənələrinin
davamçısı. Uşaq vaxtlarından musiqiyə
böyük həvəs göstərmiş, ustad xanəndələrdən
eşitdiyi muğamları və təsnifləri böyük
şövqlə el şənliklərində ifa etmişdi.
1950 illərdə Bakıda ADMM-də professional musiqi
təhsili almışdır. Seyid Şuşinskinin sinfində
bütün muğam dəstgahlarını öyrənmişdir.
B.Haşımov yumşaq tembrli səsə malik idi, onun
ifasında lirik xarakterli muğamlar xüsusi bir məlahətlə
səslənir və sevilirdi. Həmin illərdə B.Haşımovun
ifaçılığı bəstəkarlardan Fikrət
Əmirovun və Niyazinin diqqətini cəlb etmiş
və onu ADOBT-da solist dəvət etmişlər. B.Haşımovun
yaradıcılığının əsas hissəsi
bu teatrla bağlı olmuşdur. O, səhnədə
Üzeyir Hacıbəyovun «Leyli və Məcnun» operasında
Məcnun, İbn Səlam, «Əsli və Kərəm»
operasında Kərəm surətlərini böyük
məharətlə ifa etmiş və xalqın yaddaşına
həkk olunmuşdur.