Hüseynov Hacıbaba Hüseynəli oğlu
(19.03.1919, Bakı – 24.10.1993, Bakı)
–
xanəndə, xalq artisti (1991). H.Hüseynov ruhani ailəsində
böyümüşdür. Erkən yaşlarından
güclü hafizəsi sayəsində eşitdiyi dini
musiqi nümunələrini, muğamları dərindən
mənimsəmiş, əruz vəzninin qayda-qanunlarına
yiyələnərək, qəzəllər yazmağa
başlamışdır. O, əvvəlcə nağaraçı
olmuş, virtuoz qaval çalan kimi məşhurlaşmışdır.
Tədricən muğam və təsniflər oxumağa
başlamışdır. Onun səs diapazonu o qədər
də geniş olmasa da, öz tembrinə görə təsirli
və məlahətli idi. Xanəndənin zəhmətsevərliyi
və sənət axtarışları nəticəsində
əldə etdiyi ifaçılıq texnikası, poeziya
və muğamı yüksək bədii zövqlə
uzlaşdırma qabiliyyəti muğam biliciləri və
musiqisevərlər tərəfindən yüksək
dəyərləndirilmişdir.
O, muğam ustadlarının ənənələrindən
bəhrələnərək, bu sənətdə öz
dəst-xəttini yaratmağa müvəffəq olmuşdur.
Uzun illər ADMM-də muğamatdan dərs demiş, xanəndələr
yetişdirmişdir. Onun yaratdığı çoxsaylı
təsniflər musiqi irsinə daxil olmuş və muğam
ifaçılığında geniş yayılmışdır.
H.Hüseynovun yaratdığı təsniflər mürəkkəb
ritm duyğusu ilə aşılanmış melodiyaları
və zövqlə seçilmiş mətnlərinə
görə dinləyicilərin yaddaşına hopmuşdur.