Xarrat Qulunun Məktəbi
-
Qarabağ muğam ifaçılığı sənətinin
tarixində mühüm rolu olmuş muğam bilicisi Xarrat
Qulunun yaratdığı muğam tədrisi ocağı.
XIX əsrin ortalarında fəaliyyət göstərən
bu məktəb əsasən dini məqsədlərə
xidmət etmişdir. Xarrat Qulu dini mərasimlərdə
(məhərrəmlik təziyəsində) iştirak
etmək üçün gözəl səsi olan gəncləri
öz məktəbinə cəlb edir, onlara muğamatı
və oxumaq qaydalarını öyrədirdi. Lakin inkar
olunmaz bir faktdır ki, bu məktəb sonradan muğam
tədris edən musiqi məktəblərinin təşkilində
nümunə olmuşdur.
Xarrat Qulunun musiqi məktəbi dinə xidmət etsə
də, Azərb. muğam sənətinin inkişafında
mühüm rol oynamış bir sıra ustad sənətkarların
yetişməsinə səbəb olmuşdur. Qarabağın
ən görkəmli xanəndələri Hacı Hüsü,
Məşədi İsi, Dəli İsmayıl, Şahnaz
Abbas, Əbdülbağı Zülalov (Bülbülcan),
Keştazlı Həşim, Keçəçi oğlu
Məhəmməd, Cabbar Qaryağdı oğlu və
məşhur tarzən Sadıqcan həmin məktəbin
yetirmələridir. Beləliklə, Xarrat Qulunun məktəbinə
Qarabağ muğam ifaçılığı məktəbinin
inkişaf tarixində mühüm bir mərhələ
kimi baxmaq olar. Xarrat Qulunun vəfatından sonra Şuşada
musiqi məktəbində muğamın tədrisi işini
Kor Xəlifə adlı musiqiçi, daha sonra Molla İbrahim
davam etdirərək, yeni musiqiçilər nəslini yetişdirdi.