Əliyev Zamiq Balarza oğlu (25.05.1950, Bakı)

 

- tarzən, xalq artisti (2007). ADMİU-da təhsil almışdır. Tar müəllimi Hacı Məmmədov olmuşdur. 1974 ildən ADF-də işləmişdir. «Azərbaycan təranələri» x.ç.a. ansamblının tərkibində, 1974 ildən Gülarə Əliyevanın rəhbərliyi ilə «Dan ulduzu» instrumental ansamblında fəaliyyət göstərmişdir. Xarici ölkələrdə (Suriya, Livan, Əlcəzair, İspaniya, Fransa, ABŞ, Yəmən və s.) qastrol səfərlərində olmuşdur. 1979 ildə Zeynəb Xanlarovanın rəhbərliyi altında x.ç.a. ansamblının konsertmeysteri olmuşdur.

1992 ildən xanəndə Ağaxan Abdullayev, kamançaçı Ədalət Vəzirovla birgə Zülfi Adıgözəlov ad. muğam üçlüyü yaratmışdır. Bu trio İranda, İraqda Füzulinin 500 illiyi ilə bağlı YUNESKO-nun tədbirlərində çıxış etmişlər. 1997 ildən bu trioya Simarə İmanova daxil olub. 1997 ildə Səmərqənddə keçirilən “Şərq təranələri” festivalında Qran-pri mükafatına layiq görülmüşdür. 1998 ildən ADMİU-də pedaqoji fəaliyyət göstərir.

AzRT fondunda onun ifasında «Şur», «Çahargah», «Bayatı-Şiraz», «Dilkəş», «Vilayəti» və s. muğamların lent yazıları saxlanılır. «Azərbaycan muğamları» adlı diski buraxılmışdır. O, xanəndələrin repertuarına daxil olmuş 20-dən çox mahnının, o cümlədən, «Ah, bu gecə», «Ümid nəğməsi», «İlham alıram» «Allah səni pənahında saxlasın», «Gözəllər» və s. mahnıların müəllifidir.