Əlizadə Firəngiz Əliağa qızı (28.05.1947, Bakı)

– bəstəkar, əməkdar incəsənət xadimi (1990), xalq artisti (2000), professor (1999). “Şöhrət” (2007) ordeni ilə təltif olunmuş, YUNESKO-nun “Şülh artisti” (2008) fəxri adına layiq görülmüşdür. ADK-da iki ixtisas üzrə (bəstəkarlıq və piano fakultəsində - C.Hacıyev, Q.Qarayev və U.Xəlilovun sinfində) təhsil almışdır. 1970 ildə - fortepiano, 1972 ildə bəstəkarlıq fakultələrini bitirmişdir.

Həmin ildən ADK-da çalışmışdır. 1973 ildə Q.Qarayevin rəhbərliyi altında assistent olaraq çalışmışdır. 1974 ildə - SSRİ və ABİ üzvü olmuş, 1979 ildə isə ABİ İdarə Heyətinin katibi seçilmişdir. ABİ qurultay və plenumlarında, xarici ölkələrin musiqi festivallarında fəal iştirak etmiş, gözəl pianoçu olaraq Azərb. bəstəkarlarının əsərlərini ilk dəfə ifa etmişdir: M.Quliyev, A.Dadaşov, F.Qarayev, O.Felzer, R.Rüstəmzadə və b. əsərləri F.Əlizadənin ifasında respublikada və xarici ölkələrdə səslənmişdir. 1993-1998 illərdə Türkiyənin Mersin şəhərində Kültür Bakanlığının dəvəti ilə “Boş beşik” baletini bəstələmiş və bu illərdə həmin teatrda çalışmışdır. 1999 ildə Almaniyanın İncəsənət Akademiyasının dəvəti ilə (Akademie der Künste) bir neçə il (1999-2006) Berlin şəhərində yaradıcılıq ezamiyyətində olmuşdur.

F.Əlizadənin əsərləri dünyanın bir çox məşhur musiqi ifaçılarının və musiqi kollektivlərinin - Yo-Yo-Ma, İ.Monigetti, Kronus Quartet (San-Fransisko), Collegium Novum (Sürix) və b. tərəfindən ifa edilmişdir. F.Əlizadə mütəmadi olaraq xarici ölkələrdə Azərb. musiqi mədəniyyətini təmsil edərək, mühazirələrlə çıxış edir. 1990 ildə ABİ-nın VII qurultayında İdarə Heyətinin katibi, 2007 ildə Azərb. Bəstəkarlarının VIII qurultayında ABİ İdarə Heyətinin Sədri vəzifəsinə seçilmişdir. F.Əlizadənin yaradıcılıq irsi çox genişdir.

Əsas əsərləri sırasında “Qarabağnamə”, “Ağ atlı haqqında əfsanə” operaları, “Ölümsüzlüyə səyahət” oratoriyası, zərb alətləri və kamera orkestri üçün “Silk road” konserti, müxtəlif heyətlər üçün “Miraj”, “Oasis”, “Abşeron”, “Muğamsayağı”, “Atəş”, violonçel və fortepiano üçün “Habilsayağı” əsərləri qeyd olunmalıdır.