Baki Musiqi Kolleci (BMK)
- Asəf Zeynallı ad. Orta İxtisas Musiqi Texnikumu –
milli musiqiçi
kadrları hazırlayan 4 illik orta ixtisas musiqi
təhsili məktəbi. Əsası Tiflis və Moskva
konservatoriyalarının məzunu olan A.N.Yermolayeva tərəfindən
1895-1896 tədris ilində şəxsi musiqi məktəbi
kimi qoyulmuş, 1901 ildə Rus Musiqi Cəmiyyətinin
Bakı şöbəsi nəzdində fəaliyyət
göstərmişdir; bunun əsasında 1916 ildə
ilk musiqi texnikumu yaradıldı. Burada vokal,
skripka, violonçel və s. alətlərdə
çalmaq üzrə dərs keçirilirdi.
İllər ötdükcə burada təhsil alanların
sayı artmış, müəllim heyəti ixtisasçılarla
zənginləşmişdir. 1953 ildə məktəbə
Asəf Zeynallının adı verilmişdir. 1999-2000
tədris ilində Azərb. Respublikası Təhsil Nazirliyinin
əmri ilə Texnikum Bakı Musiqi Kolleci adlandırılmışdır.
BMK-nə müxtəlif illərdə Ü.Hacıbəyov,
S.Ələsgərov,
V.Adıgözəlov,
B.Mehdiyev
və b. rəhbərlik etmişlər. Hal-hazırda
BMK-nin direktoru əməkdar incəsənət xadimi,
professor Nazim Kazımovdur.
Bir əsrdən artıq yaşı olan bu musiqi məktəbi
müxtəlif ixtisaslar üzrə səkkiz mindən
artıq musiqiçi kadr yetişdirmişdir. Onun məzunlarının
sorağı yaxın-uzaq xarici ölkələrdən
gəlir. Məktəbin yetirmələri Azərb. və
onun hüdudlarından uzaqlarda yerləşən ölkələrdə
musiqi həyatında mühüm rol oynayan sənətkarlar
kimi tanınmışlar. BMK respublikada muğam
ifaçıları
yetişdirən əsas baza təhsil ocağı olmuş
və hal-hazırda da bu missiyanı daşıyır.
Burada görkəmli muğam ustadları - Seyid Şuşinski,
Mirzə Mansur Mansurov, Qurban
Primov və onların ənənələrinin davamçıları
Əhməd Bakıxanov, Bəhram
Mansurov, Nəriman Əliyev, Hacıbaba Hüseynov,
Əlibaba Məmmədov, Ağaxan Abdullayev və başqalarının
fəaliyyəti xanəndə və xalq musiqi ifaçılarının
yetişdirilməsində mühüm əhəmiyyətə
malikdir.
BMK-də hal-hazırda 1400 nəfərə yaxın
tələbə təhsil alır, 400 nəfərdən
artıq müəllim kollektivi çalışır.
Bir çox muğam ustadları kollecin müəllimləridir.