Azərbaycan Milli Konservatoriyasi (AMK)
– milli musiqi sahəsində kadrlar hazırlayan ali məktəb.
AMK-nın yaranması haqqında Azərb. Respublikası
Prezidentinin iki fərmanı olmuşdur: 13 iyul 2000 il tarixli
“Azərbaycan Milli Konservatoriyasının təsis edilməsi
haqqında”; 10 avqust 2001 il tarixli “Azərbaycan Milli Konservatoriyasının
maddi-texniki bazasının yaradılması haqqında”.
Bu fərmanlara əsasən Bakı
Musiqi Kolleci və Respublika İncəsənət
Gimnaziyası AMK-nın tərkibinə daxil edilmişdir.
AMK-da təhsil iki pilləlidir. Bakalavr və magistr pillələri
üzrə “İfaçılıq” və “Tatix-nəzəriyyə”
fakultələrində 200-dən artıq tələbə
təhsil alır. “Xalq
çalğı alətləri”, “Solo oxuma (xanəndə),
“Xalq çalğı alətlərinin orkestrləşdirilməsi
və dirijorluğu”, “Milli musiqinin tarixi və nəzəriyyəsi”,
“İnstrumental muğam”
və digər kafedralarda tar, kamança, qanun, balaban, zərb
alətləri, xanəndəlik, dirijorluq, musiqişünaslıq
ixtisasları üzrə ifaçı, tədqiqatçı
və müəllim kadrlar hazırlanır. Burada həmçinin,
“Milli musiqinin tədqiqi” və “Milli musiqi alətlərinin
araşdırılması” adlı elmi laboratoriyalar fəaliyyət
göstərir.
AMK-nın professor və müəllim heyəti görkəmli
sənətkarlardan x.ç.a üzrə ifaçılardan,
xanəndələrdən, dirijorlardan,
musiqişünaslardan ibarətdir. AMK-nın rektoru xalq
artisti, professor Səyavuş
Kərimidir. Onun rəhbərliyi altında AMK çoxşaxəli
fəaliyyət göstərən və respublikanın
musiqi həyatında mühüm rol oynayan tədris ocağı
kimi formalaşmışdır. AMK-nın müəllimləri
və məzunları Azərb. muğam sənətini
beynəlxalq aləmdə layiqincə təmsil edirlər,
onların əksəriyyəti beynəlxalq və respublika
müsabiqələrinin laureatlarıdır. AMK Avropa
Şurası və YUNESKO-nun himayəsində ELİA
(Avropa İncəsənət Universitetləri Liqası)
təşkilatının və Türkiyə Yüksək
Öyrətim Kurumunun (YÖK) üzvüdür.