Baki Muğam Məclisləri
–
XIX əsrdə Bakı
ş.-də və Bakı ətrafı kəndlərdə
(Nardaran, Mərdəkan, Maştağa, Əmircan və
b.) şair və muğamatçıları öz ətrafına
toplayan yığıncaqlar. Azərb. muğam
sənətinin inkişafında Bakı məclislərinin
böyük rolu olmuşdur.
Bakıdakı ən böyük musiqi məclisinin rəhbəri
Məşədi Məlik Mansurov (1838-1909) öz dövrünün
açıq fikirli, istedadlı, mədəni şəxslərindən
biri, “musiqiçilər ailəsinin” görkəmli nümayəndəsi
olmuşdur. Məşədi Məliyin Bakıda İçəri
şəhərdəki evinin böyük salonunda tez-tez
dövrünün məşhur ziyalıları və
sənətkarları yığışır, Qarabağdan,
Şirvandan, İrandan gələn musiqiçilər bu
evin qonağı olurdu.
Hacı Hüsü, Əbdülbaqi (Bülbülcan),
tarzən Mirzə Sadıq Əsəd oğlu (Sadıqcan),
Məşədi Zeynal kimi tanınmış Qarabağ
musiqiçiləri
Məşədi Məliklə dostluq edirdi. Məclislərdə
yerli musiqiçilər iştirak edirdilər. Burada görkəmli
xanəndə və
musiqiçilərlə yanaşı, gənclər də
ifaçılıq məharətini nümayiş etdirir,
ustadlardan bəhrələnməyə çalışırdılar.
Bu musiqi məclislərində ifaçılıq sənəti
barəsində ciddi söhbətlər aparılır,
musiqi tarixinə fikir verilirdi. Burada muğamatın nə
zaman, kim tərəfindən, hansı şəraitdə
yaradılması mövzusu məclis üzvlərini daha
çox maraqlandırırdı.
Eyni zamanda, hər bir muğam
məclisdə ayrıca müzakirə olunurdu. Muğamların
tamam-dəstgah və
düzgün oxunmasına xüsusi diqqət yetirilərdi.
Burada Ağa Səid oğlu Ağabala, Seyid Mirbabayev,
Ağa Kərim Salik, Bəylər, Əli Zühab, Mirzə
Fərəc və musiqiçilər toplaşaraq öz
musiqi sənətlərini nümayiş etdirirdilər.
Məşədi Məliyin təşkil etdiyi musiqi məclisi
Bakı musiqiçilərinin bütöv bir nəslini
yetişdirib tərbiyə etmişdi.